Сарандағы шина зауыты 100-ден астам өлшеммен дөңгелек шығармақшы

АСТАНА. KAZINFORM — Қарағанды облысының Саран қаласындағы шина зауытының өнімдері неге қазақстандықтар арасында танымал емес? Үкімет отырысынан кейін өткен баспасөз мәслихатында осы мәндегі сұрақтар қойылды.

Өнеркәсіп және құрылыс министрінің орынбасары Олжас Сапарбеков брифинг кезінде отандық маркетплейстерде аталған кәсіпорын өнімдері еркін сатылып жатқанын өз ұялы телефонындағы қосымша арқылы дәлелдеуге тырысты. 

— Шина зауыты іске қосылғаннан бері Саранда 300 мың автомобиль дөңгелегі шығарылды. Оның ішінде биыл 200 мың данасын шығару жоспарланған. Қазір 37 өлшемдегі дөңгелек жасалады. Дөңгелек өлшемдерінің санын 100-ден асыру көзделіп отыр. Біз өндірісті одан әрі кеңейтіп, басқа да сегменттерді қамтуды жоспарлап отырмыз, — деді вице-министр.

Еске салсақ, былтыр күзде Саран қаласы тарихта тұңғыш рет елеулі салық түсімі қалыптаса бастағаны айтылған еді.