Семейде соққыға жығылған баланың қазіргі жағдайы қалай
СЕМЕЙ. KAZINFORM – Семейде дәрігерлер соққыға жығылған 6 сынып оқушысының қазіргі жағдайын айтып берді.
Абай облыстық Денсаулық сақтау басқармасының мәліметіне сүйенсек, 11 жастағы бала қазір педиатрдың, травматологтың және невропатологтың динамикалық бақылауында.
— Жеткіншек ауруханаға 23 ақпанда түсті. Оған дер кезінде медициналық және психологиялық көмек көрсетіліп, қажетті тексерулер жүргізілді. Қойылған диагноз — жабық бас-ми жарақаты. Басында, аяқ-қолында көптеген теріасты гематомалар анықталды. Баланың жағдайы қанағаттанарлық деңгейде. Бірақ психоэмоционалдық күйі мен диагнозына байланысты бақылауды қажет етеді, — делінген ақпаратта.
Ведомство дерегінше, балаға қажетті диагностикалық тексерулер жүргізіліп, соның қорытындысы бойынша өміріне қауіп төндіретін себептер анықталған жоқ.
Еске салсақ, бұған дейін Семейде 6-сынып оқушысын соққыға жыққан 3 жеткіншектің әке-шешесі ата-аналық құқығынан айырылғаны хабарланған.
Сондай-ақ мектеп директоры жұмыстан шығарылған болатын.
