Сенатор: БЖЗҚ салымшыларының мүддесін қорғай алмай жатырмыз
АСТАНА. KAZINFORM – Парламент Сенаты Қаржы және бюджет комитетінің төрағасы Сұлтанбек Мәкежанов Ұлттық банк өкілдерін БЖЗҚ салымшыларының мүддесін негізгі басым бағытқа қоюға шақырды.
- Тақырыпта жалғасақ, Ұлттық банкке қарсы уәж айтқым келеді. Батыс елдерімен бізді салыстыру соншалық дұрыс емес шығар. Сіз айтып отырған жаһандық зейнетақы индексінде инвестициялардың ақылға қонымдылығы бойынша 41 орында тұрмыз. Жылдар бедерінде қарасақ, бұл көрсеткіш жылдан-жылға нашарлап отырған. Бұл мәселені өкілетті орган да жылы жауып келеді. Неге нашарлап жатыр? Соған қарамастан Еуропа елдеріне қарағанда жағдайымыз жақсы деп қоямыз. Бұл жерде ойланатын дүние баршылық, әріптестер. Былтыр салған 1,5 трлн теңге туралы айтқанда ел экономикасына инвестиция салуға ешкім тыйым қоймағаны түсінікті. Бірақ салымшылардың мүддесін қорғауға да ешкім тыйым қойған жоқ. Бастысы осы, - деді ол.
Сенат депутаты БЖЗҚ ақшасы тиімді жұмсалып жатыр деген мәліметке күмәнмен қарайтынын айтты.
- Ұлттық банктің 1,5 трлн теңгені «Самұрық Қазына» мен «Бәйтерек» арқылы тиімді шығардық деген ұстанымымен келісе алмаймын. 300 млрд теңгені агроөнеркәсіп кешеніне салып, бұл өте жақсы салым болды деп қалай айтуға болады? Біз ол салада не болып жатқанын білеміз. Расымен аграрларға көмектесіп жатқан шығармыз, бірақ салымшылардың мүддесін қорғай алмай жатырмыз, - деді Сұлтанбек Мәкежанов.
Бұған дейін Ұлттық банк төрағасының орынбасары Ақылжан Баймағамбетов Бірыңғай жинақтаушы зейнетақы қорының ақшасы қандай жобаларға инвестицияланатынын айтқан еді.
