Серік Жұманғарин пәтер сатып алуда қолма-қол ақшасыз есеп айырысуды енгізуге қатысты түсінік берді

АСТАНА. KAZINFORM — Премьер-министрдің орынбасары — Ұлттық экономика министрі Серік Жұманғарин пәтер сатып алу кезінде қолма-қол ақшасыз есеп айырысу ұсынысына пікір айтты.

Бүгін Мәжілістің жалпы отырысында «Қазақстан Республикасының кейбір заңнамалық актілеріне астананы және республикалық маңызы бар қалаларды дамыту мәселелері бойынша өзгерістер мен толықтырулар енгізу туралы» заң жобасы бірінші оқылымда қаралып жатыр.

Бұл тұрғыда Мәжіліс депутаты Бақытжан Базарбек өз қызметіне адал қарамайтын құрылыс салушыларға қатысты мәселе көтерді.

— Депутаттық корпус түрлі жұмыс топтарында (талқыланып жатқан заң жобалары аясында) құрылыс компанияларының жауапкершілігін қатаңдатуға тырысып келеді. Яғни, сапасыз баспана салатын немесе заңсыз құрылыс жүргізетіндерге қатысты тиісті реестрді енгізуді ұсынып отырмыз. Қазір Астанада осындай реестр ресми емес тәртіпте құрылған. Алайда заңнамалық деңгейде реттелмеген. Меніңше, Астана, Алматы және Шымкент әкімдіктері осы мәселені шешуге мүдделі. Дегенмен, депутаттық корпустың бастамаларына Үкіметте теріс қорытынды шығарып отыр. Мәселен, басқа (заң жобасы бойынша) жұмыс тобында құрылыс салушылардың қылмыстық жауапкершілігін енгізуге талпындық, бірақ бұған теріс қорытынды келді. Сонымен қатар, пәтер сатып алу кезінде қолма-қол ақшасыз есеп айырысу енгізуге тырыстық. Алайда осыған да қолдау жасалмады, — деді Бақытжан Базарбек.

Мұнымен қоса, депутат елордадағы ақылы тұрақ иелері елеулі қаражат салмаса да, қомақты табыс алып отырғанын айтты. Сондықтан осы жеке автотұрақтарды мемлекеттің қарауына қайтару ұсынысы атап өтілді. 

Өз кезегінде Премьер-министрдің орынбасары Серік Жұманғарин аталған реестрге қатысты ұсыныстарды Үкімет талқылауға дайын екенін жеткізді. 

— Ал (пәтер сатып алу кезінде) қолма-қол ақшасыз есеп айырысуға тоқталсақ, қазір қаралып жатқан реформалар аясында осы мәселелерді пысықтап отырмыз. Жалпы, салық төлеуден жалтаруды барынша азайтатын нормалар бойынша құжатқа түзетулердің екінші пакетін (Мәжіліске) енгіземіз. Сондықтан бұл салада депутаттарды бірлесе пікір алмасуға шақырамын. Ал ақылы тұрақтарға қатысты айтатын болсақ, қазір қаралып отырған өзгерістер аясында мәслихаттарда жаңа функциялар пайда болады, — деді Серік Жұманғарин.

Еске салсақ, жақында «Отбасы банк» акционерлік қоғамының басқарма төрайымы Ләззат Ибрагимова Қазақстанда баспана алу кезінде қолма-қол ақшасыз есеп айырысуды енгізу тетігі пысықталып жатқанын айтқан еді. 

Биыл ақпан айында Астанадағы ақылы тұрақтарды әкімдікке беруге қатысты пікір айтылды.