Шерзат Полат ісі: Судья отырысты Талдықорғаннан Алматыға көшіруден бас тартты
ТАЛДЫҚОРҒАН. KAZINFORM — Талдықорғанда кісі қолынан қаза тапқан жасөспірім Шерзат Полаттың ісі бойынша сот процесі жалғасып жатыр.
Сот отырыс барысында айыпталушылардың бірінің мүддесін қорғаған адвокат Әбенов соттан істі Алматыға ауыстыруды сұрады. Оның айтуынша, отырыстарды қалалық тергеу изоляторында өткізу тиімдірек, өйткені бұл көптеген қатысушы үшін логистикалық тұрғыдан ыңғайлы.
Мұндай ұсынысты жәбірленуші тараптың адвокаты Шекеев те айтты. Ол Талдықорғанға жол ұзақ екенін алға тартып, егер процесс Алматыға ауыстырылмаса, онлайн қатысуға рұқсат сұрады.
Шерзаттың әжесі де ұзақ жолда қан қысымы көтерілетінін жеткізіп, судьядан сотты көшіруді өтінді.
Судья Ержан Жанұзақов оған сот процесіне қатысудан босату туралы өтініш жазуға болатынын айтты.
— Алты адвокат бар. Егер бір-екеуіңіз қатыса алмасаңыздар да, сотты жалғастыра береміз. Онлайн қатысуға мүмкіндік жоқ, өйткені трансляция жүріп жатыр. Онлайнда сіздердің дауыстарыңыз естілмей қалуы мүмкін немесе техникалық ақаулар туындауы ықтимал, — деді Ержан Жанұзақов.
Судья әуел бастан істі қарау орны ретінде Талдықорған қаласы белгіленгенін және бұл шешім күшінде қалғанын еске салды.
Шерзат ісі бойынша нақты 9 күдікті бар, оның ішінде бір жасөспірім ауыр қылмыс туралы хабарламағаны үшін айыпталып жатыр.
Абзал Шынасыл — адам өлтіру және бұзақылық жасағаны үшін айыпталып отыр. Равиль Сақиев — кісі өлтіруге оқталу және бұзақылық бойынша айыпталды. Шыңғыс Белғожаев, Дархан Әскентай, Нұрқияс Ильясов, Нұрбол Тоқтаубаев мен Азамат Тоқтаубаев, Дидар Қалиахмет — бұзақылық бойынша айыпталып жатыр. Ал кәмелетке толмаған Думан Ысқақ — ауыр қылмыс туралы хабарламағаны үшін айыпталып отыр.
Айта кетейік, 10 сәуір күні Талдықорғанда Шерзат Полаттың өлімі туралы іс бойынша алдын ала тыңдау өткен болатын.
Оның барысында, 16 жастағы Шерзат Полатты айуандықпен өлтірді деп айыпталғандар алқабилер сотынан бас тартты.
Сондай-ақ Прокурор соталушылардың әрқайсысына ҚР Қылмыстық кодексінің қай баптары бойынша айып тағылғанын оқыды.
Былтыр 4 қазан күні төбелестен 16 жастағы жасөпірім қайтыс болғанын жазғанбыз.
Кейін ашулы талғарлықтар жасөспірім өліміне байланысты наразылыққа шықты.
2024 жылдың 12 қазанында қара жамылған отбасының үйі өртеніп кетті. Алматы облысының Полиция департаменті бөтеннің мүлкін қасақана жою фактісі бойынша іс қозғады.
15 қазан күні Талғар қаласының әкімі Бахыт Қуатбекұлы Күрішбеков, Талғар қаласы әкімінің орынбасары Матан Сағындық өз міндеттерін тиісті деңгейде атқармағаны үшін лауазымдарынан босатылды. Артынша, Талғар ауданы әкімі аппаратының басшысы Аслан Қасымбаев қызметінен қуылды.
2024 жылдың желтоқсан айында Талғар маңында Шерзат Полаттың ағасының денесі табылды.
Бас прокурордың орынбасары Ғалымжан Қойгелдиев Шерзат Полаттың үйінің өртенуіне қатысты тергеудің жаңа мәліметтерін айтты.
