Шығыс Қазақстанда тағы да қар көшкіні түсірілді
ӨСКЕМЕН. KAZINFORM – Шығыс Қазақстан облысында жасанды жолмен қар көшкіні жүргізілді.
«Қазселденқорғау» мекемесінің мамандары бақылау жүргізгеннен кейін профилактикалық қар көшкінін түсіру туралы шешім қабылданды. ШҚО ТЖД қызметкерлері жұмыстың қауіпсіздігін қамтамасыз етті.
- «Өскемен-Тарғын-Самар» тасжолындағы тау бөктерінде бірнеше жарылыс жасалды. Соның нәтижесінде барлығы 5100 текше метр қар түсірілді. Қар жолды толықтай жауып қалды. Арнайы техника бірден жолды қардан тазартты, - деп хабарлады облыстық Төтенше жағдайлар департаментінің баспасөз қызметі.
Айта кетейік, өңірде қар көшкіні қаупі бар кезеңнің басынан бері 59 рет профилактикалық көшкін жүргізілді. Барлығы 51465 текше метр қар түсірілген.
Еске салсақ, бұған дейін әлеуметтік желіде Өскемен қаласында төтенше жағдай енгізілгені туралы тарап жатқан ақпарат шындыққа сәйкес келмейтіндігі хабарланған.
