ШЫҰ Аймақтық антитеррорлық құрылымының 2030 жылға дейінгі жоспары мақұлданды
ТАШКЕНТ. KAZINFORM – Ташкентте Шанхай Ынтымақтастық Ұйымы Аймақтық антитеррорлық құрылымының 43-ші отырысы өтті, деп хабарлайды Kazinform агенттігінің меншікті тілшісі.
Отырыстың негізгі бөлігі жабық форматта өтті. Оған ШЫҰ Бас хатшысы Нұрлан Ермекбаев және ұйымға мүше елдердің өкілдері қатысты. Оның барысында тараптар ынтымақтастықты тереңдету мәселелерін талқылап, Аймақтық антитеррорлық құрылымының былтырғы жұмысын қорытындылады.
Делегаттар шағын құрамда өткен келіссөзден кейін тиісті құжаттарға қол қойды. Атап айтқанда, ШЫҰ Аймақтық антитеррорлық құрылымының 2026-2030 жылдарға арналған ынтымақтастық жоспары мақұлданды.
Сондай-ақ алдағы уақытта ұйымдастырылатын іс-шаралардың жоспары бекітілді. Оған сай, ШЫҰ-ның Терроризм мен экстремизмге қарсы күрес бойынша 11-ші халықаралық конференциясы Өзбекстанда өтеді.
Бұған қоса, ұйымға мүше мемлекеттердің терроризмге қарсы бірлескен оқу-жаттығулары Беларусьте ұйымдастырылады.
Ал, Қырғызстанда ШЫҰ елдерінің шекара қызметтері басшыларының 11-ші отырысы өтеді.
Еске салайық, таяуда Қытай тарапы Ташкентте өткен дөңгелек үстел барысында ШЫҰ-ға төрағалық ету кезеңінде атқаратын жұмыстардың жоспарымен бөліскен еді. Ресми Бейжің ұйым аясындағы ынтымақтастықты 8 бағыт бойынша ілгерілетпек.
Былтыр шілдеде Астанада өткен ШЫҰ саммиті барысында 25 құжатқа қол қойылды. Көптеген әлем елдері Қазақстанның ұйымға төрағалығын жоғары бағалады. Еліміздің бастамалары ұйымның жұмысына серпін берді.
Сонымен қатар, таяуда Түркия ШЫҰ-ның толық мүшесі атануға ниетті екенін мәлімдеді.
