Ішкі істер министрлігі «Заң мен тәртіп» жаңа цифрлық сервисті іске қосты

АСТАНА. KAZINFORM - Egov Mobile қосымшасында «Заң мен Тәртіп» деген жеке батырма пайда болды. 

Елорда әкімдігі ресми сайтының хабарлауынша, бұдан былай батырманы басқан сәтте полицияға шағым жолдау терезесі ашылады. 

Енді кез келген құқық бұзушылық, тұрмыстық зорлық-зомбылық, жол-көлік оқиғасы, балаға қатысты оқыс оқиға немесе қоғамдық тәртіптің бұзылуы жөнінде бір ғана батырманы басу арқылы қоңыраусыз және полиция бөліміне бармай-ақ хабарлауға болады. 

Полиция хабарламаны жедел қабылдап, бірден әрекетке көшеді. 

Еске сала кетейік, бұған дейін алдағы уақытта елордада жол ережесін Sergek дрондар бақылайтынын жазған едік.