Швеция ядролық шабуылға қарсы он мыңдаған бункерін күшейтпек

АСТАНА.KAZINFORM - Швеция азаматтық баспаналарын қайта жаңарта бастады, деп хабарлайды BILD.

Елдегі барлық 64 мың бункер адамдарды ядролық соққыдан қорғай алатындай күйге келтірілуі тиіс. Бұл туралы Швецияның азаматтық қорғау қызметі (MSB) хабарлады. Жөндеу жұмыстарына 100 миллион крон бөлінді, бұл шамамен 9 миллион еуроны құрайды.

MSB мәліметінше, қажет болған жағдайда бункерлер 7 миллионға жуық адамға қорған бола алады (Швецияның бүкіл халқы шамамен 10,5 миллион адам).

Елде мұндай баспаналардың екі түрі бар: тұрғын үйлерге салынған баспаналар және жартастарға қашалған немесе ерекше берік бетоннан салынған «фелльбункерлер». Олар жарылыс толқындары мен сынықтардан ғана емес, радиациялық, химиялық немесе биологиялық қарулардан да қорғайды.

Модернизация жобасы Швецияда қабылданған «жалпы қорғаныс» стратегиясына сәйкес келеді, соғыс болған жағдайда әрбір азамат өз рөлін білуі және әрекет етуге дайын болуы керек. Қазірдің өзінде 25 үлкен бункерде жөндеу жұмыстары басталып кетті.

Швеция премьер-министрі Ульф Кристерссон ел 2030 жылға қарай әскери шығындарды ішкі жалпы өнімнің 2,4%-ынан 3,5%-ына дейін арттыратынын айтты. Ол мұны «қырғи-қабақ соғыстан кейінгі ең үлкен қорғаныс кешені» деп атады. 2023 жылы Швеция бейтараптықтан бас тартып, НАТО-ға кірді.

Осыған дейін Швеция ұлттық қауіпсіздікке қатер төндіретін адамдарды азаматтығынан айыратынын хабарлады.