Сирия армиясы Идлибтің оңтүстігіндегі содырларға зымырандық шабуыл жасады
АСТАНА. KAZINFORM – Рувайха, Хан-эс-Сабил және Мардабса елді мекендеріндегі содырлардың орналасқан жерлері Сирия армиясының шабуылына ұшырады. Бұл туралы Mehr агенттігі хабарлады.
Хабарға сәйкес, ұшақтар Идлибтің оңтүстігіндегі Джебел-эз-Завия таулы аймағында және Алеппоның солтүстігіндегі Мареа қаласында содырлардың позицияларына шабуыл жасауда.
Сирия армиясының қолбасшылығы бұған дейін үкімет күштерінің Алеппо және Идлиб провинцияларында «Джебхат ан-Нусра» лаңкестерінің шабуылдарына тойтарыс беруді жалғастырып жатқанын мәлімдеген.
Сирия армиясының қолбасшылығы 28 қарашада бір күн бұрын «Джебхат ан-Нусра» бөлімшелері Сирияның солтүстік провинцияларына ауқымды шабуыл жасағанын хабарлаған.
Лаңкестер бірқатар аудандар мен әскери нысандарды басып алуға әрекеттенген, сонымен қатар үкімет әскерлерінің позицияларына шабуыл жасаған.
Кейінірек Al Mayadeen телеарнасы Сирия үкіметінің армиясы Алеппо қаласының солтүстігі мен батысындағы 20 елді мекенді басып алған соң содырлардың позицияларына қарсы шабуыл жасағанын хабарлады.
Еске салсақ, бұған дейін сириялық көтерілісшілер Алеппоның орталық аудандарына жеткені хабарланды.
