СҚО-да әлеуметтік нысандардың жартысынан астамы қысқы жылыту маусымына әзір
СҚО энергетика және тұрғын үй-коммуналдық шаруашылық басқармасының мәліметінше, қысқа әзірлік қызу жүріп жатыр. Жалпы 500-ге жуық қазандық болса, соның 46% дайын. 602 білім беру нысанының 54%, денсаулық сақтаудың 62% бүгінгі күні қысқа әзірленді.
«Қазіргі уақытта 351 автономды қазандықтың 188 немесе 54% - ы дайындалған. Бюджеттік мекемелер үшін 140 мың тонна көмір қажет. Шарттар жасалды, қаржыландыру бар. Көмір жеткізіліп жатыр. Бүгінде 44,5 мың тонна немесе 32% әкелінді.
Бұдан басқа облыста 24 орталық қазандық бар, олар да қысқа әзірліктен өтуі тиіс. Оның 9-ы - жекеменшік қазандық», - дейді басқарма мамандары.
Орталық қазандықтар үшін қыстан қысылмай шығу үшін 59 мың тонна көмір қажет. Нормативтік қор шарттарға сәйкес тамыз айында және жылыту кезеңі ішінде жүргізілмек.
Өңірде 1386 көпқабатты тұрғын үй болса, соның 34% жылыту жүйесін жуып-шайып, қысыммен тексерді.
«1 шілдеден бастап апта сайын халықтың қатты отынды дайындауына мониторинг жүргізіледі. Қыс мезгілінде тұрғындар 419 мың тонна шамасында көмір тұтынады. Қатты отын тұйықтарға маусым айынан бастап түсіріле бастады. Бұл жұмыс жылыту маусымы кезінде де жүргізіледі. Тұрғындар әзірге 82 мың тонна көмір немесе 20% дайындады», - дейді мамандар.
Облыс аумағында халыққа және коммуналдық-тұрмыстық қажеттіліктерге көмір сату үшін 32 көмір тұйығы бар, оның 4-уі Петропавлда орналасқан. Көмірді бөлшек саудада тек 24 кәсіпорын - 15 ЖШС және 9 жеке кәсіпкерлік жүзеге асырады. Қазіргі уақытта, басқарманың мәліметінше, облыстың тұйықтарында 38 мың тонна көмір бар, оның ішінде Петропавл қаласында 3,8 мың тоннасы жатыр.
Мамандардың айтуынша, бағаны негізсіз өсірмеу үшін апта сайын көмір құнына мониторинг жүргізіледі.
Көмір бағасы көмір маркасына байланысты тоннасына 12,5-тен 20 мың теңге шамасында сатылып жатыр. Екібастұз көмірі 12,5 мыңнан 14 мың теңгеге дейін, Шұбаркөл 17 мыңнан 19 мың теңгеге дейін, Қаражыра 15,5 мыңнан 20 мың теңгеге дейін, Майкөбе 15-18 мың теңге аралығында саудаланады.