СҚО-да өзендерде мұз жару жұмысы жүргізіліп жатыр

ПЕТРОПАВЛ. KAZINFORM – Солтүстік Қазақстан облысында көктемгі су тасқыны қарсаңында өзендерде мұз жару жұмысы басталды.

СҚО Төтенше жағдайлар департаменті баспасөз қызметінің мәліметінше, 10 наурыз күні Қызылжар ауданындағы Красный Яр және Долматово елді мекендерінің маңында Есіл өзенінде мұз жарылды. Қамтылған аумақ 2,5 мың шаршы метр. Жұмысты мамандандырылған жауапкершілігі шектеулі серіктестік атқарды. Оқиға орнында сондай-ақ құтқарушылар, жергілікті атқарушы орган өкілдері және полиция қызметкерлері жұмыс істеді.

Бұл жұмыс көктемгі су тасқынының алдын алу шаралары аясында жүргізіліп жатыр. Мұздың көбесі сөгіліп, сең жүріп, кесек мұз кептеліс тудыруы мүмкін. Салдарынан су деңгейі көтеріліп, өзен-көлдер арнасынан асып, тасиды. Әрі қатты екпінмен келген мұз кесектері жолдағыны бұзып өтеді. Былтыр СҚО-дағы бірнеше ауыл жарықсыз қалды.

Петропавл қалалық әкімдігі 12 наурыз күні облыс орталығының Ойқала және бау-бақша серіктестіктерінің маңында Есіл өзенінде мұз жару жұмысы жүргізілетінін ескертті. Сондықтан мұндай жұмыс атқарылғанда мұз үстіне шығу қауіпті және жұмыс атқарылып жатқан аумаққа жақындауға тыйым салынады.

Бұған дейін СҚО-ға көктемгі тасқынмен күреске Қарағанды облысынан 50 әскери қызметші келгенін жазған едік.