СҚО-да 150-ге жуық дәрігердің орны бос тұр

ПЕТРОПАВЛ. KAZINFORM — Солтүстік Қазақстан облысында дәрігер тапшы. Биыл өңір жұмысқа 131 маманды алғанымен, қазір тағы 144 дәрігердің орны бос тұр.

СҚО қоғамдық кеңесте өңірде дәрігер жетіспеушілігі мәселесі көтерілді. Денсаулық сақтау басқармасының басшысы Қаныш Бижановтың айтуынша, қазір өңірде 1 444 дәрігер бар. Оның 52-сі зейнеткерлік жасқа жетсе, 141 қазірдің өзінде зейнеткер.

Жетіспейтін 144 дәрігердің тең жартысы аудандық ауруханаларға қажет. 

«Облыстық мәслихаттың шешіміне сәйкес өңірге келген мамандарға 1 млн-нан 5 млн теңгеге дейін көтермеақы беріледі. Петропавлға жұмысқа жіберілген жалпы практика дәрігеріне 1 млн теңге мөлшерінде, ал бейінді мамандарға 3,5 теңге мөлшерінде, ауылдық жерлерге және кенттерге, аудандық маңызы бар қалаларға жұмыс істеуге жіберілген жалпы практика дәрігерлеріне 1,5 млн теңге, сол сияқты ауылға барған бейінді мамандарға 5 млн теңге көтермеақы қарастырылған. Биыл жыл басынан бері 52 дәрігерге 181 млн теңге төленді», — дейді Қаныш Бижанов.

Былтыр жұмыс істеуге келген 128 дәрігер жалпы сомасы 335 млн теңге жәрдемақы алған.

«Петропавлдағы «Дәрігер үйінде» бос тұрғын пәтер болған жағдайда жас маман баспанамен қамтамасыз етіледі, аудандарда жергілікті атқарушы органдар қызметтік тұрғын үй береді. Сондай-ақ, маман пәтерді жалға алған жағдайда 3 жыл бойы қосымша ақы төлеу қарастырылған. Қазіргі уақытта облыс әкімдігіне аса тапшы мамандықтардың тізімін бекітуге жоба жолданды, ол бойынша келген әр маманға 8,5 млн теңге мөлшерінде әлеуметтік қолдау көрсету көзделген», — дейді басқарма басшысы.

Маманның айтуынша, биыл жергілікті бюджет қаражаты есебінен резидентурада оқуға 50 грант бөлінді. Қазіргі уақытта шарттар жасалып, 34 резидент білім алып жатыр. Жыл басынан бері облысқа 21 резидент дәрігер келді. 

Бұған дейін Петропавлдағы 2-ЖЭО кәсіпорнында 200 маманның орны бос тұрғанын жазған едік.