Сілеті өзенінде мұз жару жұмыстары жүргізілді
ПАВЛОДАР. KAZINFORM — Аталған өзеннің арнасы тасыса Ақтоғай ауданына қарасты Шолақсор ауылын басып қалу қаупі бар.
Сілеті үш облыстың: Ақмола, Павлодар және Солтүстік Қазақстан аумағын басып өтеді.
Өзеннің Ақтоғай ауданы аумағындағы арнасында мұз кептелісін болдырмау үшін мұз жару жұмыстары жүргізілді. Мамандардың айтуынша, өзенде сіресіп жатқан мұзды су көтерілмей тұрып жару, қызыл суды өткізу қабілетін артады. Өзен арнасы Шолақсор ауылы арқылы өтетінін ескерсек, аталған іс-шара елді мекенді су басу қаупін азайтуға ықпал етеді.
— Жарылыс жұмыстары су қоймаларындағы мұз кептелістерінің алдын алуға бағытталған. Жұмыстар өзен арнасының тарылған жерлерінде, төрт учаскеде, жалпы ауданы 1154 шаршы метр аумақта жүргізілді. 144 кг жарылғыш зат пайдаланылды. Қазіргі уақытта құтқарушылардың жедел тобы мұзды ұсақтау және кесу бойынша іс-шараларды жүзеге асырып жатыр, — деп хабарлады өңірлік төтенше жағдайлар департаментінің баспасөз қызметінен.
Жарылыс жұмыстары облыс әкімі бекіткен инженерлік жұмыстар жоспарына сәйкес жүргізілген. Оны әзірлеу кезінде өткен жылдардағы су тасқынына жүргізілген талдау, климаттық болжамдар, сондай-ақ өңір аймағының ерекшеліктері ескерілген.
Еске сала кетейік, Мемлекет басшысы су тасқынына қарсы шараларға баса назар аударуды тапсырды.
