Солтүстік Африка мен Оңтүстік Азия мемлекеттеріне астық экспортталады - АШМ
АСТАНА. KAZINFORM — 2024 жылғы астықтың жаңа өнімінің 5,5 млн тоннасы экспортталды. Бұл туралы ҚР Ауыл шаруашылығы вице-министрі Ермек Кенжеханұлы мәлім етті.
- 2024 жылдың қорытындысы бойынша 8,1 млн тонна экспортқа жөнелтілді. Ал былтыр күзде жиналған өнімге тоқталсақ, қыркүйек айынан қазірге дейін 5,5 млн тонна астық шетелге шығарылды, - деді Е. Кенжеханұлы Сенатта тілшілер сұрағына жауап бере отырып.
Оның айтуынша, Қазақстан астығы дәстүрлі нарықтарға экспортталып жатыр.
- Барлық елдер бойынша оң өсім байқалып отыр. Сонымен қатар, астық экспортталатын жаңа нарықтар іздестіріліп жатыр. Соның арасында Солтүстік Африка мен Оңтүстік Азия мемлекеттеріне экспорттау мүмкіндігі зерделенді, - деді вице-министр.
Оның сөзіне қарағанда, қазір астық экспортына керек жүк вагондары тиісті деңгейде қамтамасыз етілген.
Бұдан бұрын хабарланғандай, ҚР Ауыл шаруашылығы министрлігі биыл астық қанша гектар жерге егілетінін нақтылады.
