Соңғы 5 жылда Қызылордада сотталғандар саны 57,5%-ға өскен

ҚЫЗЫЛОРДА. KAZINFORM — Қызылорда облысында қылмыстық атқару жүйесіне қарасты 3 мекеме бар. Оларда 1400-ге жуық адам жазасын өтеп жатыр.

Статистикалық мәліметке сүйенсек, соңғы 5 жылда өңірде жазасын өтеушілер саны 57,5%-ға өскен. 

Облыстық прокуратура бұл мəселенің шешімі ретінде сотталғандарды шартты түрде мерзімінен бұрын босату, жазаны жеңіл түрге ауыстыру мүмкін болмаған жағдайда қауіпсіздігі барынша төмен мекемелерге ауыстыруды ұсынып отыр. 

— Бұл мекемеден шықпай-ақ залалды өтеуге және сотталған адамның қоғамға бейімделуіне мүмкіндік береді. Қазіргі күні қауіпсіздігі барынша төмен мекемеде жұмыспен қамтылғандар саны 81% шамасында, — деді облыс прокуроры Ризабек Ожаров.

Қылмыстық кодекске енгізілген өзгерістер аясында «закладчиктердің» жазасы төмендеп, есірткі өңдеушілерге қатысты жаза күшейді. Осыған орай № 60 мекемедегі 142 адам жазасын өтеу мерзімінің аяқталуына байланысты босатылса, 136 адамның жазаны өтеу мерзімі едәуір қысқармақ.

Бұған дейін Ішкі істер министрлігі елдегі түрме режимі ең жиі бұзылатын мекемелерді атап көрсетті.