Сорбұлақ трагедиясы: әскери ұшқыш Бахтияр Ержігітовті туыстары жер қойнына тапсырды
ПАВЛОДАР. KAZINFORM — Бүгін Шарбақты ауданы, Шалдай ауылынан шыққан ұшқыш – Бахтияр Ержігітовті туған-туыстары мен жақындары ақтық сапарға шығарып салды. Бұл туралы Павлодар облысының әкімдігі мәлім етті.
— Сорбұлақ көлі үстінде әскери тікұшақ кенеттен байланыссыз қалған сәтте, бәріміздің жүрегіміз бір үміт, бір күдікпен соқты. «Аман болар… оралар…» деген тілекпен алаңдап, дұғада болдық. Алайда тағдырдың жазуы басқа екен. Бахтияр — ата-анасының көз қуанышы, отбасының тірегі, елінің ертеңіне үміт болған азамат еді. Ақтөбедегі әскери училищені, Талғат Бигелдинов атындағы әскери институтты тәмамдап, Семейде, кейін Жетігенде қызмет етті. Борт инженері қызметінен майор шеніне дейін көтерілді. Жасы небәрі 32-де еді. Бірақ сол қысқа ғұмырдың өзі — ерлікке, елге адалдыққа толы болды, — деп жазды әкімдіктен.
Естеріңізге сала кетейік, 25 шілде күні Алматы облысында жоспарлы ұшу барысында Қазақстан Республикасы Қарулы Күштері Әуе қорғанысы күштерінің EC-145 тікұшағы радардан жоғалып кеткен еді.
Сол сәттен бастап, жедел іздестіру жұмыстары басталды. Берілген бағыт бойынша тікұшақтармен тексерді. Сорбұлақ су қоймасын қаралды. Қазғарыштан алынған суреттер арқылы жанар-жағармайдың ізі табылды. Сорбұлақ су қоймасына жақын жерден тікұшақтың бірнеше бөлшегін табылды. Содан бастап штаб құрылып, іздеу жұмыстары басталды.
Ал 9 тамыз күні14 метр тереңдікте тікұшақтың сынықтары мен мәйіт анықталған болатын.
Кеше Сорбұлақта екінші адамның мәйіті табылды.
— Ертіс-Баян жұртшылығы атынан жары Раушанға, балалары Ахмад пен Айлинге, ата-анасы Сәниолла Ержігітұлы мен Айман Задашқызына қайғырып көңіл айтамыз. Сіздердің қайғыларыңыз — баршамыздың ортақ қайғымыз. Бахтияр есімізде мәңгі, жүректерге өшпестей із қалдырған қаһарман батыр. Жаны жәннәтта, нұры пейіште шалқысын, - деп жазды облыстық әкімдіктен.
