Сот орындаушысына ақша төлеуден құтқаратын роботты қалай пайдалануға болады

АСТАНА. KAZINFORM – Робот сот орындаушылары іске қосылғалы бері халықтың 600 млн теңгесін үнемдеген. Бұл туралы ҚР Әділет вице-министрі Бекболат Молдабеков айтты. 

— Робот сот орындаушы былай жұмыс істейді. Мысалы сіз камераға түсіп қалдыңыз және сізге 20 АЕК-ке дейін әкімшілік айыппұл жазылды делік. Егер бір айдың ішінде төлемесеңіз, бұрын қалай өндірілетін еді? Іс сот орындаушыға беріледі. Сот орындаушы сізге қоңырау шалады, жұмысыңызға хат жазады, ақыры сізден сол ақшаны өндіреді. Сол айыппұлдың көлемі 10 мың теңге болса, оның үстіне 2 жарым мың теңге, яғни айыппұлдың 25 пайызын сол сот орындаушыға төлейсіз. Осы үшін бізге көп азамат шағымданады. Сол себептен біз осындай робот сот орындаушысын іске қостық, - деді ол Үкімет отырысының кулуарында. 

Оның айтуынша, робот сот атқарушының жұмысын автоматты түрде өзі атқарады. 

— Айыппұл салынған адамға смс жібереді. Тіптен, eGov mobile-ға, Halyk Bank, Kaspi секілді ол қолданатын банк қосымшаларына хабарлама жолдап, айыппұлды қазір төлесе, 25 пайыз үнемдейтінін ескертеді. Бірақ қоңырау шалмайды, - дейді Бекболат Молдабеков. 

Вице-министр бұл қызмет былтыр тамыз айында іске қосылғаннан бері халықтың 600 млн теңгесін үнемдегенін айтты. Жүйе бұған дейін елімізде 20 АЕК-ке дейінгі айыппұлдарды қараса, биыл оған 40 АЕК-ке дейінгі айыппұлдарды беру көзделген. 

Бекболат Молдабековтің айтуынша, осы өзгеріс енгізілген соң жыл соңына дейін халықтың 7 млрд теңгесі үнемделеді.