Сот жүйесінің институционалдық дербестігі нығайды - Президент

АСТАНA. KAZINFORM – Сот жүйесінде кадрларды іріктеу жүйесі жаңартылды. Бұл туралы Қазақстан судьяларының съезінде ҚР Президенті Қасым-Жомарт Тоқаев мәлім етті.

«Біз соттардың тәуелсіз болуына баса мән беріп отырмыз. Осыған орай бірқатар жұмыс атқарылды. Елімізде Конституциялық сот құрылды. Сот жүйесінің институционалдық дербестігі нығайды. Сала бюджетін басқару құзыреті Сот әкімшілігіне берілді. Күштік құрылымдар судьяларға қысым көрсетпеуі үшін тиісті шаралар қабылданды. Кадрларды іріктеу жүйесі жаңартылды. Бірінші сатыдағы сот төрағасы қазылар қауымының ұсынысымен тағайындалады. Жоғарғы соттың судьялары Конституцияда көрсетілген жаңа тәртіп бойынша сайланатын болды, яғни, оларды Сенат баламалы негізде таңдайды», - деді Қасым-Жомарт Тоқаев.

Сонымен қатар Президент алқабилер тәжірибесі кеңінен қолданыла бастағанын айтты. Қазір оларды іріктеу жұмысы цифрлық жүйеге толық көшкен.

«Сондай-ақ Әкімшілік әділет қызметі пайда болды. Бұл құрылым жеке адамдардың және кәсіпкерлердің құқығын тиімді қорғауға мүмкіндік береді. Бүгінде сот істерінің жартысынан астамы азаматтар мен бизнестің пайдасына шешіліп жатыр. Бұл – жақсы үрдіс. Түптеп келгенде, мұның бәрі экономиканы өркендетуге және еліміздегі инвестициялық ахуалды жақсартуға жол ашады. Инвесторлардың заңға сәйкес әрі алаңсыз жұмыс істеуі үшін барлық жағдай жасалуы қажет. Олар мемлекет қорғауында екеніне сенімді болуы керек», - деді Мемлекет басшысы.

Бұдан бұрын хабарланғандай, бүгін елордада ҚР Президенті Қасым-Жомарт Тоқаевтың қатысуымен Қазақстан Республикасы судьяларының IX съезі басталды.