Су тасқыны жағдайы: Бірқатар өңірлер жоғары әзірлік деңгейіне көшіріледі

  АСТАНА. ҚазАқпарат - Қазақстанның бірқатар өңірінің азаматтық қорғаныс қызметтері жоғары әзірлік режіміне көшірілуі тиіс. Бұл туралы бүгін Үкіметтің селекторлық режімдегі отырысында ҚР Ішкі істер министрінің бірінші орынбасары Жанат Сүлейменов айтты, деп хабарлайды ҚазАқпарат.

«Қазіргі уақытта Шығыс Қазақстан облысында 403 үй су астында қалып отыр. 326 үйден су сорып алынды. Қарағанды облысында су басқан 12 үйден су толығымен айдалды. Құтқарушылар тобын күшейту үшін Шығыс Қазақстан облысына Ішкі істер министрінің орынбасары Юрий Ильиннің басшылығымен жедел топ жіберілді. 92 адам, 14 техника, 58 мотосорғы мен 8 қайықтан тұратын қосымша күш жеткізілді»,- деді ол.

Оның айтуынша, қазіргі уақытта Шығыс Қазақстан облысындағы апаттық құтқару және шұғыл жұмыстарға 454 адам мен 253 техника жұмылдырылған.

«Осыған байланыст ы Ауыл шаруашылығы, Инвестициялар және даму министрліктері аталған облыстар мен Астана және Алматы қалаларының әкімдіктерімен бірлесіп, азаматтық қорғаудың мемлекеттік жүйесінің, салалық күш-құрылымдарының жұмыс істеу режімін жоғары әзірлікке көшіруі қажет. Сонымен қатар елді мекендердің тұрғын үйлері мен нысандарын су басуына жол бермеу үшін кешенді шаралар қабылдау керек», - деді Жанат Сүлейменов.