Суданда жаңбыр мен су тасқынынан қаза тапқандар саны 77-ге жетті

ХАРТУМ. KAZINFORM – Соңғы үш күнде Ніл өзені провинциясында су тасқыны салдарынан 34 адам қаза тауып, тағы 588 адам жарақат алды, деп хабарлады Anadolu агенттігі Суданның Қызыл Жарты Ай ұйымына сілтеме жасап.

24 мың 104 үй толықтай, 8 мың 16 үй жартылай қираған, делінген хабарламада.

Солтүстік провинцияның Денсаулық сақтау министрлігі соңғы үш күнде толассыз жауған жаңбыр мен су тасқыны салдарынан 11 адам қаза тауып, 86 адам жарақат алғанын атап өтті.

Елде маусым айынан бері толассыз жауған жаңбыр мен су тасқынынан қаза тапқандар саны 77-ге жетті.

Біріккен Ұлттар Ұйымының Судандағы гуманитарлық істерді үйлестіру кеңсесі елді қамтыған нөсер жаңбырдан туындаған су тасқынының салдарынан 73 мың адамның зардап шеккенін, 14 мың үйдің ішінара немесе толығымен қирағанын хабарлады.

Суданның 18 провинциясының 11-інде су тасқыны байқалып, 21 мың 370 адам үйлерін тастап кетуге мәжбүр болған.

Суданда шілдеден қазанға дейін нөсер жауын, лай көшкіні мен су тасқыны жыл сайын 100-ден астам адамның өмірін қиып, ондаған мың үйді, жұмыс кеңселерін және егін алқаптарын зақымдайды.