Суды ынтымақтастық құру ресурсы ретінде қарастыру қажет — министр
САМАРҚАНД. KAZINFORM — Өзбекстанда өтіп жатқан Климат форумы аясында ҚР Су ресурстары және ирригация министрі Нұржан Нұржігітов Kazinform тілшісіне сұхбат беріп, су тапшылығы мәселесін шешуге бағытталған жобалардың барысын баяндады.
— Су ресурстары көлемінің қысқарып бара жатқанын барлық сарапшы айтып жүр. Тіршілік нәрін пайдалануды реттеуден бөлек, суды ынтымақтастық құру ресурсы ретінде қарастыру керек. Бұл мәселе бірлескен шешімдерді талап етеді, — деп мәлім етті министр.
Нұржан Нұржігітовтің айтуынша, Қазақстанның Халықаралық су-энергетика консорциумын құру бастамасы осы ынтымақтастықты ілгерілету жолындағы маңызды қадам.
— Қазақстан Орталық Азия елдерінің Халықаралық су-энергетика консорциумын құрумен айналысатын жұмыс тобын құрды. Су мен энергетика бір-бірімен тығыз байланысты, екеуін бөлек қарастыруға болмайды. Сонымен қатар суды үнемдеу мәселесін тиімді шешу қажет. Яғни, су көлемінің қысқаруы экономика секторларына теріс әсер етпеуі керек. Бұл мәселе дамуға кедергі болмауы тиіс. Бұл ретте ұтымды үнемдеу жобаларын қолға алдық, — деді ведомство басшысы.
Министр осы күндері Самарқанд қаласында өтіп жатқан Климат форумы аталған мәселелерді шешу жолында өзара іс-қимылдарды пысықтау үшін аса маңызды екенін атап өтті. Оның барысында Еуропа Одағы тарапынан Орталық Азия елдеріне қаржы тарту және тәжірибелік қолдау көрсету мүмкіндігі талқыланды.
— Біз Еуропа елдерінде бар инновациялық шешімдерді Орталық Азияға, оның ішінде Қазақстанға бейімдеуіміз керек. Атап айтқанда, қазіргі уақытта Германияның GIZ компаниясы бізге жерасты суларын зерттеп, мониторинг жүргізіп, талдау жасайтын ақпараттық жүйені бізге ұсынып отыр. Бұл жүйе бұрыннан бар және тиімді жұмыс істеп келеді. Енді біз оны өзіміздің елге бейімдеуіміз қажет, — деп жауап қатты Нұржан Нұржігітов Kazinform тілшісінің сауалына жауап бере отырып.
Бұған қоса ведомство басшысы AFD француз компаниясымен ҚР Су ресурстары және ирригация министрлігі арасында жасалған келісімге тоқталды. AFD қазақстандық тарапқа құны 1,35 млн доллар болатын грант ұсынды. Бұл қаражатқа Іле-Балқаш бассейніне зерттеу жүргізіледі және 2040 жылға дейін атқарылуы тиіс жұмыстардың жоспары бекітіледі.
Еске салайық, осы күндері Өзбекстанның Самарқанд қаласында Климат форумы өтіп жатыр. Кеше іс-шараның ашылу салтанатына Мемлекет басшысы Қасым-Жомарт Тоқаев қатысып, сөз сөйледі. Онда Президент Орталық Азия өңіріндегі жаһандық жылыну әлемдегі орташа көрсеткіштен екі есе жылдам жүріп жатқанына тоқталды.
Сонымен қатар аталған форумға қатысқан ҚР Экология және табиғи ресурстар министрі Ерлан Нысанбаев климаттың өзгеруі мәселесі аймақтық ауқымда тиімді шешілуі керек екенін мәлімдеді.
