Табиғатты талқандап жатыр: жетісулық белсенділер дабыл қақты
ТАЛДЫҚОРҒАН. KAZINFORM - Жетісулық бір топ белсенді Көксу өзенінің жағасында жүріп жатқан құрылыс жұмыстарына наразы. Желіге тараған жазбаға қатысты Жетісу облысының табиғи ресурстар және табиғатты пайдалануды реттеу басқармасы жауап берді.
Жетісу облысындағы белсенділер Кербұлақ ауданы, Көксу өзені маңында белгісіз біреулердің өзен маңын арнайы техникамен қазып жатқанын желіге жариялаған еді.
Айтуларынша ешқандай ескертпесіз әлдекімдер табиғатты бүлдіріп, заңсыз құрылыс жүргізіп жатыр. Облыс тұрғындары мен демалушыларға таптырмайтын мекенді техникамен таптап, тасын қопарғандарға наразылық білдіргендер мәжіліс депутаттарына мұны назарға алуды өтінді. Наразы топтың үндеуіне Жетісу облысының табиғи ресурстар және табиғатты пайдалануды реттеу басқармасы жауап берді.
— Жетісу облысы Кербұлақ ауданында Рудничный СЭС құрылысын салу үшін 3,7 га жер учаскесі облыс әкімінің (13.08.2020 ж. № 301) қаулысымен 2025 жылдың 1 шілдесіне дейін «ЭнергоБилдСервис»ЖШС-не берілген болатын. Аталған жоба бойынша қоғамдық талқылаулар 2024 жылғы 11-18 наурыз аралығында өтті. Қоғамдық тыңдаулар барысында жұртшылық тарапынан ескертулер мен ұсыныстар түскен жоқ. «ЭнергоБилдСервис» ЖШС тарапынан Рудничный СЭС-1, 2 құрылысының жобалық құжаттамасынтүзетуге (корректировка) байланысты 2024 жылғы 26 наурызда жұмыс жобасын «Қоршаған ортаны қорғау» бөлімі қосылып, «Жетісу облысының табиғи ресурстар және табиғатты пайдалануды реттеу басқармасына жолданды. Басқарма мемлекеттік экологиялық сараптаманың оң қорытындысын шығарды. Қазір басқарма басшысы Кербұлақ ауданы және Текелі қаласы әкімінің орынбасарларының, сондай-ақ «ЭнергоБилдСервис» ЖШС өкілінің қатысуымен кеңес өткізді. Жиын барысында барлық мән-жай анықталғанға дейін құрылысты тоқтатуға, сондай-ақ Рудничный СЭС-1, 2 құрылысы бойынша мүдделі жұртшылықтың қатысуымен жиналыс өткізу туралы шешім қабылданды», - деді Жетісу облысының табиғи ресурстар және табиғатты пайдалануды реттеу басқармасы.
Еске салайық осыған дейін Жетісу облысында ауаның ластану деңгейі төмен екенін жазған едік.
