Талдықорғанда үйінен қашып кеткен ағайынды екі жасөспірім табылды
Екі хабар-ошарсыз кеткен кәмелеттік жасқа толмағандар туралы шағым ІІБ-ге 2 тамызда келіп түсті. Факті бойынша мән-жайды зерделеген кезде балалардың үйде ата-анасымен жанжалдасып қалып кетіп қалғаны белгілі болды. Олар ұялы телефондарын сөндіріп тастаған.
«Іздеу бөлімі, ювенальдық полиция, патрульдік және учаскелік бөлім қызметкерлері қала, саяжайларды тексерді. Түрлі ойын салондарынан, аула клубтарынан, бассейндер мен саябақтардан қарады. Нәтижесінде, ағайындылардың кішісі үш тәулікте, ағасы төртінші күні табылды. Осы уақыт аралығында ағайындылар Талдықорған шетінде орналасқан көлік жуатын орындардың бірінде жұмыс істеп ақша тапқан. Қазір екеуі де аман-есен, туыстарына табыс етілді», - деп мәлім етті ІІД-нің баспасөз қызметі.
Полицейлерге жасөспірімдер үйде ұрыс-керіс бола берген соң қашып кеткендерін айтты. Қазір ювенальдық полиция отбасыны бақылауға алды. Олар үйдегі қалыптасқан жағдайды зерделемек. Бұдан басқа полицейлер авто жуу орнын, кәмелеттік жасқа толмаған балаларды не үшін жұмысқа алғанын білу үшін сол жердің иесін тексеруге ниетті.