Теннис: Кукушкин Дубай турнирінде ойнаудан бас тартты
Қазақстандық теннисші оң иығын ауырсынуына байланысты осындай шешімге келді.
Жүлде қоры 2,9 млн АҚШ долларына жуықтайтын Дубай турнирінде М.Кукушкинді лаки-лузер ретінде шақырылған әлемнің 96-ракеткасы, чехиялық Иржи Веселы алмастырды. Биыл әлемнің 6-ракеткасы, жапониялық Кей Нисикори бастаған мықты теннисшілер қатысып жатқан Дубай турнирі 2 наурызда мәреге жетеді.
Өткен жылы испаниялық Роберто Баутиста-Агут бұл жарыстың жеңімпазы атанған болатын.
Тағы бір қазақстандық теннисші, әлемнің 153-ракеткасы Александр Бублик Рау (Франция) челленджер турнирінің екінші айналымында рейтингте 460-орындағы испаниялық Хавьер Косано Барранкомен шеберлік байқасады.
Ал әйелдер арасында Индиан-Уэллстегі челенджер турнирінің екінші айналымында қазақстандық Зарина Дияс ұлыбританиялық, әлемнің 111-ракеткасы Хитер Уотсон немесе қытайлық, рейтингте 169-орындағы Хань Син-Юньнің бірімен кездеседі.
Еске сала кетейік, бұдан бұрын М.Кукушкиннің Марсель турнирінің финалында жеңіліп қалғанымен, әлемдегі үздік қырық теннисшінің қатарына енгенін жазған болатынбыз.