Теңіз кен орны толық қуатта қашан іске қосылады — министр жауабы
АСТАНА. KAZINFORM — Энергетика министрі Алмасадам Сәтқалиев елімізде мұнай өндіру көлемінің арту себебін түсіндірді.
— Мұнай өндірісі көлемінің артуы болашақта өндірісті кеңейту жобамыздың сынақ түрінде іске қосылуымен және Теңіз кен орнындағы ұңғыма қысымын басқару жобасының іске қосылуымен байланысты. Қазір бұл бағыттағы жұмыс жалғасуда және кен орны толық қуатта іске қосу әзірге жоспарда жоқ. Жоспарға сәйкес, толық қуатта екінші жартыжылдықта іске қосу күтіледі. Бұл бізге тәуекелді басқаруға белгілі бір мүмкіндік береді. Сонымен қатар халықаралық консорциумдардың қатысушылары мен акционерлерімен кеңес өткіздік және талқылауды келесі аптада ExxonMobil, Total, Shell басқа да ірі компаниялардың басшыларымен жалғастыруды жоспарлап отырмыз, — деді Алмасадам Сәтқалиев ведомствода өткен баспасөз мәслихатында.
Министрдің мәлімдеуінше, Қазақстан кеңес алдына мұнай өндіру көлемін төмендету міндетін қойып отыр, ол белгіленген параметрлерге қол жеткізу үшін қажет.
— Диалог өте нәтижелі өтті, бас тарту туралы жауап алған жоқпыз, керісінше, Қазақстан Республикасы Үкіметі қойған міндеттерді орындау мүмкіндіктерін конструктивті түрде талқыладық, — дейді ведомство басшысы.
Бұған дейін хабарлағанымыздай Қазақстан ОПЕК+ келісімі шеңберінде мұнай өндірісін қысқартады.
Еске сала кетсек, былтыр жыл соңында ОПЕК+ елдері мұнай өндіруді 2026 жылға дейін қысқартуға келіскен еді.
Биыл ақпанда белгілі болғандай, ОПЕК+ елдері сәуірден мұнай өндіру көлемін арттыруға уағдаласты.
Бірер күн бұрын белгілі болғандай Қазақстан ОПЕК+ келісімі шеңберінде өз міндеттемелеріне адалдығын растады.
