Тоқаев: Үнемі өзін жетілдіре білген адам міндетті түрде табысқа жетеді
АСТАНА. KAZINFORM – Мемлекет басшысы Қасым-Жомарт Тоқаев бәсекеге қабілетті ұлттың негізгі көрсеткішін атады.
- Әр азамат мына бір қарапайым қағиданы терең ұғынуға тиіс: бір орында тұрып қалмай, үнемі өзін жетілдіре білген адам міндетті түрде табысқа жетеді. Бәсекеге қабілетті ұлт дегеніміз – осы. Біз қолға алған реформалар елдің дамуына зор серпін берді. Қоғамның өзгерістерге деген үмітін оятып, әділдікке деген сенімді қалпына келтірді, - деді Қасым-Жомарт Тоқаев Бурабайда өткен ұлттық құрылтайда.
Сондай-ақ Президент ұлттық құндылықтарға қатысты бет-жүзді тұмшалайтын қара киімнен гөрі өзіміздің ұлттық киімдеріміз әлдеқайда артық екенін айтты.
Одан бөлек Қасым-Жомарт Тоқаев ел өңірлерінде өтетін түрлі мәдени-туристік іс-шараларды бренд ретінде қалыптастыруды жүктеді.
Сонымен қатар ұлттық құрылтайда жыл соңына дейін елімізде 188 медицина нысаны салынатыны белгілі болды.
