Трамп 2028 жылғы президент сайлауына қатысуы мүмкін

АСТАНА. KAZINFORM – АҚШ президенті Дональд Трамп көптеген адамдардың өзінен 2028 жылы мемлекет басшысы қызметіне қайта үміткер болуын сұрап жатқанын айтып, бұл туралы ойланып көретінін мәлімдеді, деп жазады ТАСС.

– Білесіздер, біз қайта сайланғымыз келеді. Көптеген адам маған соны ұсынады. Бұл туралы ойланамын, дегенмен бұл - өте күрделі мәселе, – деді ол Қатардағы Әл-Удейд америкалық әскери базасында сөйлеген сөзінде.

Америкалық көшбасшы бұл сөзін әзіл ретінде айтып, болашақ сайлауалды науқанға ұран ретінде: «Трамп-2028: солшылдарды есінен тандырайық» деген нұсқаны ұсынды.

Сонымен қатар, бұған дейін Трамп президенттікке үшінші мәрте сайлауға түсу ниеті жоқ екенін айтқан болатын.

АҚШ Конституциясына 1951 жылы енгізілген 22-ші түзетуге сәйкес, бір адам екі реттен артық мемлекет басшысы болып сайлана алмайды. Келесі президент сайлауы АҚШ-та 2028 жылы өтеді.

Бұған дейін 20 штат Трамп әкімшілігін сотқа бергенін жаздық.