Түркістан облысында 200-ге жуық полицей марапатталды
Жеңіс саябағында өткен жиынға Полиция департаментінің бастығы, полиция генерал-майоры Қайрат Дәлбеков пен аппарат жетекшілері, жеке құрамы мен ішкі істер органдарының ардагерлері, қызметтік міндеттері орындау кезінде қайтыс болған тәртіп сақшыларының жақындары мен туған-туыстары және басқа құрметті қонақтар қатысты.
Полиция департаментінің ұйымдастыруымен өткен салтанатты жиынға қатысушылар қиын да қауіпті қызмет бабында қаза тапқан батыр полицейлерді еске алып, даңқ мемориалына гүл шоқтарын қойды. Жаңадан жұмысқа қабылданған жас полиция қызметкерлері ант қабылдап, ардагерлерді марапаттау рәсімі өтті. Арнайы даярлық және жұмылдыру басқармасының сақшылары қылмыскерлерді ұстау кезіндегі іс-қимылдарын көрсетіп, жиналғандарды өздерінің мықтылығымен тәнті етті. 
Облыстық Полиция департаментінің бастығы Қайрат Дәлбеков пен Ардагерлер кеңесінің төрағасы О.Жанқожаев полицейлерді мерекелерімен құттықтап, ізгі тілектерін жеткізді.
Мерекелік шара сондай-ақ, Түркістандағы мәдениет үйінде жалғасын тапты. Онда өзінің қызметтік міндеттерін адал атқарып, жоғары көрсеткіштерге қол жеткізгендері үшін бірқатар полицейлер марапатталды. Атап айтқанда, ҚР ІІМ тарапынан 15 полицейге түрлі дәрежедегі марапаттар ұсынылса,ТО ПД-нің бастығы, полиция генерал-майоры Қайрат Дәлбеков 30-дан астам полицейге грамота табыс етті. 40-қа жуық қызметкерді алғыс хатпен марапаттап, 50 тәртіп сақшысына алғыс жариялады.
Сонымен қатар, полиция қызметкерлері облыс әкімінің алғыс хатымен, мәслихат атынан, Нұротан партиясы тарапынан, Қ.А.Яссауи атындағы ХҚТУ атынан алғыс хаттар алды. Бұдан бөлек, Департамент бастығының бұйрығымен кейбір полицейлердің тәртіптік жазалары алынып тасталды.
Салтанатты іс-шара соңы дарынды полицейлер мен облыстық эстрада жұлдыздарының мерекелік концертіне ұласты.
