Түркияда Ираннан ұшырылған баллистикалық оқ-дәрі жойылды

АСТАНА. KAZINFORM — Иран аумағынан ұшырылып, Түркия әуе кеңістігіне кірген баллистикалық оқ-дәрі НАТО-ның Шығыс Жерорта теңізінде орналастырылған әуе және зымыранға қарсы қорғаныс жүйелері арқылы залалсыздандырылды. Бұл туралы Түркияның Ұлттық қорғаныс министрлігі мәлімдеді.

— Оқ-дәрінің сынықтары Газиантеп провинциясы аумағындағы шөлейт жерге құлады. Оқиға салдарынан қаза тапқандар немесе зардап шеккендер жоқ, — делінген хабарламада.

Ведомство Түркияның тату көршілік қатынастар мен өңірлік тұрақтылыққа ерекше мән беретінін атап өтті.

— Дегенмен еліміздің аумағы мен әуе кеңістігіне бағытталған кез келген қауіп-қатерге қарсы барлық қажетті шаралар батыл әрі кідіріссіз қабылданатынын тағы да атап өтеміз, — деп мәлімдеді министрлік.

Сондай-ақ ведомство бұл мәселеде Түркияның ескертулерін сақтау барлық тараптың мүддесіне сай келетінін еске салды.

Еске салсақ, 4 наурызда Түркия қорғаныс министрлігі Ираннан бағытталған зымыранның жойылғанын хабарлады.

Кейіннен Ердоған Ираннан ұшырылған зымыранның жойылуына қатысты пікір білдірді.

Өз кезегінде НАТО Түркияға жасалған зымыран шабуылынан кейін әскери дайындығын күшейтетіні мәлім болды.