Түркиядағы наразылықтар: «Болашақ» стипендиаттарына қауіп жоқ

АСТАНА. KAZINFORM – Халықаралық бағдарламалар орталығы Түркиядағы жағдайды бақылауды жалғастырып, стипендиаттармен байланыста екенін мәлімдеді, деп хабарлайды Kazinform агенттігі.

— Түркиядағы ахуалға байланысты «Халықаралық бағдарламалар орталығы» АҚ елдегі 25 стипендиаттың тағылымдама бағдарламалары бойынша білім алып жатқанын хабарлайды. Барлық стипендиаттар қауіпсіз жерде. Олар орталықтың кураторларымен және Қазақстан Республикасының дипломатиялық өкілдіктерімен тұрақты байланыста. Қажет болған жағдайда көмекке жүгіне алады, — деп жазылған хабарламада.

Бұған дейін Қазақстанның Түркиядағы елшілігі наразылыққа байланысты қазақстандықтарға үндеу жасаған болатын.

— Ең бастысы — зардап шеккендер жоқ. Бұл Сыртқы істер министрлігінің, бас консулдықтың және Анкарадағы елшілігіміздің белсенді жұмысының нәтижесі. Біздің Ыстанбұл, Измир және Анталия қалаларында бас консулдықтар бар. Наразылық басталған сәттен проактивті жұмыс жүргіздік. Біз азаматтарымызды, әсіресе студенттер мен туристерді бірден ескертіп, жаппай жиналатын және наразылық өтетін орындарда болмауға шақырдық, — деді Сыртқы істер министрінің бірінші орынбасары Ақан Рахметуллин.

Соңғы дерек бойынша, Түркияда Ыстанбұл мэрінің ұсталуына қарсы наразылық кезінде 1400-ден астам адам тұтқындалды.