Түркістан облысында колледж студентін өлтіру күдігімен шетелдік ұсталды — министр

АСТАНА. KAZINFORM — ҚР Ішкі істер министрі Ержан Саденов Түркістан облысында колледж студентін өлтірген күдікті туралы айтып берді. 

Ведомство басшысының айтуынша, қылмысқа қатысы бар деген күдікпен бір адам қамауға алынған.

— Күдікті ретінде шетелдік қамауға алынды. Қазір тергеу амалдары жүріп жатыр. Істің жай-жапсарын содан кейін айтамыз, — деді Ержан Саденов.

Бұған дейін Түркістан облысының Ордабасы ауданына қарасты Төрткүл ауылында жас қыздың мәйіті табылғанын, ол колледждің бірінші курс студенті болғанын хабарлаған едік. 

Қайғылы оқиға 6 маусым күні таңғы сағат 07:05 шамасында тіркелген.