Түркістан облысында «Жайлы мектеп» құрылысын жоспардан кешіктіргендер ескерту алды
ТҮРКІСТАН. KAZINFORM — Түркістан облысында «Жайлы мектеп» ұлттық жобасы аясында 3 үш жыл ішінде 63 мектеп салу жоспарланған. Бүгінде өңірде жыл соңына дейін пайдалануға берілетін 29 мектептің құрылысы жүріп жатыр. Жобаға қатысты абаттандыру және жолдардың құрылыстары да дер кезінде аяқталуы тиіс.
Бүгін білім нысандарының құрылысындағы проблемалар талқыланды. Мәселен, мектеп құрылысын жоспардан кешіктіріп жатқан құрылыс компанияларының өкілдері жұмыс барысындағы кедергілерді түсіндірді. Бірі құрылыс материалдарының бағасы шарықтап, жеткізу мерзімінің созылуын алға тартса, енді бірі жұмыс қолының жеткіліксіздігін айтты. Тағы бірі сараптама қорытындыларының мерзімінің созылуын атады. Облыс әкімі жауапсыздық танытқандарға шара қаралатынын ескертті.
«Бұл — тарихта болмаған жоба. Оның орындалуы — бәрімізге сын. Сондықтан мойындарыңызға алған жауапкершілікті сезініп, жұмысты мерзімінде және сапалы аяқтауға бар күштеріңізді салыңыздар. Әртүрлі сылтау, бос сөз айтып, баланың тірлігін жасаудың қажеті жоқ. „Көтере алмайтын шоқпарды беліңе байлама!“ деген, енді ақталу артық. Әр нәрсенің сұрауы бар. Бітіріңіздер, бітті. Сіздерден басқа сұрау жоқ. Кедергілер болса, дер кезінде көтеру керек. Мерзімдердің бұзылуына ешқандай жол беруге болмайды. Бұл ретте жұмыстардың сапасы ақсамауы тиіс. Олай болмаған жағдайда жауапты тұлғаларға шаралар қолданылатын болады», - деді Дархан Сатыбалды.
«Жайлы мектеп» ұлттық жобасы 2023-2025 жылдар аралығында іске асырылады. Ауқымды жоба еліміздегі мектеп тапшылығы мен үш ауысымда оқыту мәселесін жою мақсатында жүзеге асып жатыр. Бұған демографиялық өсім мен мектептердің ескіруі себеп болып отыр.
Құрылысы бірыңғай стандарт бойынша жүргізілетін оқу нысандары жиһазбен, заманауи құралдармен жабдықталады. Бастауыш және жоғары сыныптар үшін оқу кабинеттері және спорт залдары бар жеке блоктар қарастырылған. Оған қоса, жоғары деңгейдегі қауіпсіздік шараларымен қамтамасыз етілмек. Мектептердің ішкі жабдығын қамтамасыз етуде отандық өндірісті тарту көзделген.
