Тяньцзиньдегі ШЫҰ саммиті: ротациялық төрағалық Қырғызстанға тапсырылды
АСТАНА. KAZINFORM – Тяньцзинь қаласында өткен ШЫҰ саммитінің қорытындысы бойынша Шанхай ынтымақтастық ұйымына төрағалықты 2025-2026 жылдар аралығында Қырғыз Республикасына тапсыру туралы шешім қабылданды. Бұл туралы ҚХР Сыртқы істер министрлігі таратқан мәлімдемеде айтылған, деп хабарлайды Kazinform меншікті тілшісі.
Қытай сыртқысаяси ведомствосының мәлімдемесінде ШЫҰ-ға мүше мемлекеттердің қауіпсіздігіне қатысты сын-қатерлерге қарсы тұрудың Әмбебап орталығын, Ақпараттық қауіпсіздік орталығын және Халықаралық ұйымдасқан қылмысқа қарсы күрес орталығын, сондай-ақ ШЫҰ Есірткіге қарсы орталығын құру процесі басталғаны айтылған.
ШЫҰ-ға мүше мемлекеттердің Мемлекет басшылары кеңесінің Тяньцзинь декларациясына, ШЫҰ-ның 2035 жылға дейінгі даму стратегиясына және қауіпсіздікті нығайту және экономикалық, мәдени-гуманитарлық салалардағы ынтымақтастықты жандандыру және ШЫҰ ұйымдық дамуы туралы басқа да қорытынды құжаттарға қол қойылып, қабылданды.
– Лаосқа диалог бойынша серіктес мәртебесін беру және ШЫҰ төрағалығын 2025-2026 жылдарға Қырғыз Республикасына беру туралы шешім қабылданды, - делінген хабарламада.
Еске сала кетейік, бұған дейін Мемлекет басшысының «ШЫҰ плюс» саммитіне қатысқанын хабарлаған болатынбыз.
Бүгін Қытайдың Тяньцзинь қаласында өткен ШЫҰ саммиті аяқталды. Президенттің сапары ертең Бейжің қаласында жалғасады.
