Угандада болған көшкіннен 14 адам қаза тапты

АСТАНА. KAZINFORM – Уганда шығысындағы Буламбули ауданындағы алты ауылды басып қалған көшкіннен қаза тапқандар саны 14-ке жетті, деп хабарлады Уганда Қызыл Крест қоғамы (УҚКҚ) бейсенбі күнгі мәлімдемеcінде, деп жазады Синьхуа.

Жергілікті шенеуніктердің және туыстарының хабарлауынша, сәрсенбі күні түнде көшкін кезінде 100-ден астам адам із-түзсіз жоғалып, ондаған үй көміліп қалғанын айтты.

Хабарға сәйкес, 14 мәйіт табылып, ауыр жарақат алған 15-ке жуық адам жергілікті медициналық мекемеге жеткізілген.

УҚКҚ мәліметінше, сәрсенбі күні кешке таулы аймақта жауған жаңбыр салдарынан болған көшкін 40 үйді су басып, қалғандары жартылай зақымданған.

Жергілікті билік өкілдері зардап шеккен отбасыларға азық-түлік пен уақытша баспана сияқты шұғыл гуманитарлық көмек қажет деп дабыл қағуда.

Угандада қатты жауын-шашын кезінде көшкін жиі болады. Тамыз айында Уганданың орталығында көшкін жүріп, 30-дан астам адам қаза тапқан. Мамыр айының басында елдің батысындағы Касесе ауданындағы көшкін 8 адамның өмірін қиған.

Айта кетейік, Угандада Виктория көлінде қайық апатқа ұшырап, 20 адам мерт болғанын жазған едік.