Үгітілген веложол: Ақтөбеде жобалық-сметалық құжаты жоқ құрылысқа келісім берген шенеунік сотталды
АҚТӨБЕ. KAZINFORM – Тұрғын үй – коммуналдық шаруашылық бөлімінде төрт жыл бұрын басшының міндетін атқарған Жанболат Құсмұхамбетов 3 жылға бас бостандығынан айырылды. Ол веложолдың жобалық-сметалық құжаты болмаса да, алғашқы келісімшартқа қол қойған.
Сот кабинетіндегі дерекке сүйенсек, іс алдымен Қылмыстық кодекстің «Сенiп тапсырылған бөтен мүлiктi иемденiп алу немесе талан-таражға салу» бабы бойынша сотқа түсті. Кейін Қылмыстық кодекстің «Лауазымды өкілеттіліктерді теріс пайдалану» бабына өзгертілді.
- Жанболат Құсмұхамбетов Қылмыстық кодекстің 361 бабы 4 бөлігі 3 тармағымен айыпты деп танылып, 3 жылға бас бостандығынан айыру жазасы тағайындалсын. Жазасын өтеу орны - қылмыстық атқару жүйесінің қауіпсіздігі орташа мекемесі, - деді судья Ақмарал Алиева.
Сотталушының қорғаушылары үкіммен келіспейтінін, апелляциялық шағым түсіретінін мәлімдеді. Тіпті сот отырысы кезінде істі тоқтату туралы ұсыныс берді.
- Бұл 2021 жылы қалалық тұрғын үй-коммуналдық шаруашылық бөлімінде басшының міндетін атқарушы болды. Сонда жарты жыл жұмыс істеді. Веложол салу туралы келісімшартқа қол қояды. Кейін оны басқа қызметке ауыстырады. Ол әрі қарай бұл жұмысты атқармаған. Одан кейін бөлімде 4 басшы болды. Олар ақша аударған, орынбасарлары тексеруінде болған. Ал Жанболат Құсмұхамбетов ол кезде мүлде болмаған. 2021 жылы бірінші келісімшартқа қол қойғанда бар болғаны 15 млн теңге аударылған. Негізі келісімшарт жасалады, мәслихат шешімімен ақша кезең-кезеңімен аударылады. Тергеу жобалық-сметалық құжаты болмаған жоба болған соң неге келісімшартқа отырады деп тұр, - деді қорғаушы Бауыржан Иманов.
Әкімдік сайтындағы ақпаратқа сүйенсек, Жанболат Құсмұхамбетов Ақтөбе қалалық құрылыс бөлімінің басшысы қызметіне 2022 жылы тағайындалды.
Еске салсақ, Ақтөбе облысы бойынша ішкі мемлекеттік аудит департаментінің басшысы Сәкен Қасымовтың айтуынша, құны 1,3 млрд теңге болатын жобада жобалық-сметалық құжат болмаған. Кейін 665 761 900 теңгенің жұмысы атқарылды деп ақша аударылған. Аудит кезінде 34 млн теңгеден астам қаржының жұмысы атқарылмағаны белгілі болды.
