Ұлттық ұланның әскери қалашықтарында мыңға жуық камера орнатылады

АСТАНА. KAZINFORM – Биыл жыл соңына дейін Ұлттық ұланның әскери қалашықтарында мыңға жуық бейнебақылау камерасы орнатылады. Бұл туралы IIM Ұлттық ұлан Тәрбие және әлеуметтік-құқықтық жұмыс бас басқармасының бастығы, полковник Нұрбай Бектұрсынов айтты.

- Қазіргі уақытта Ұлттық ұланның әскери қалашықтары бейнебақылау жүйесінің 216 кешенімен жабдықталған. Оның 51-і – «Ұлан» кешені, 165-і – жеке жабдықталған бейнебақылау жүйесі. Жалпы, әскери қалашықтың аумағында, жатын орын-жайларда, қару-жарақ сақтау қоймаларында, асханаларда, жуыну бөлмелерінде, тұрмыстық қызмет көрсету бөлмелерінде, жауынгерлік қызмет атқаруы және тәуліктік кезекшілік атқаруы орындарында орнатылған 3 218 бейнебақылау камерасы жұмыс істейді. Жылдың соңына дейін әскери қалашықтарда шамамен 1 мың бейнебақылау камерасын орнату жоспарланып отыр, - деді Нұрбай Бетұрсынов Орталық коммуникациялар қызметіндегі брифингте.

Ал Ұлттық қауіпсіздік комитетінің Шекара қызметі директорының орынбасары Серік Рахимов әскерге шақырылушылар арасында жарғылық емес қарым-қатынастарды болдырмау үшін өткен жылдан бастап жаңадан келгендер мен одан бұрын шақырылған әскери қызметшілердің бөлек қызмет ету тәжірибесі енгізілгенін айтады.

- Яғни, олар қызмет кезінде бір-бірімен байланыста болмайды. Бұл жанжалдардың туындауын барынша азайтады. Сондай-ақ, командирлер сарбаздарды тәулік бойы бақылайды. Корпоративтік құндылықтар, бірлік пен бауырластық рухы қалыптастырылады. Шекара қызметі Қазақстан Республикасының шекаралық қауіпсіздігін қамтамасыз етудің 2024-2028 жылдарға арналған кешенді жоспарын әзірледі. Бұл жоспарда әлеуметтік проблемалар да қамтылған. Аталған кешенді жоспарда негізгі 3 басымдық көрсетілген: шекаралық инфрақұрылымды жақсарту, шекараны инженерлік тұрғыда нығайту, мобильді күштерді жабдықтау, - деді Серік Рахимов.

Ұлттық ұлан қатарында 30-дан астам ұлт өкілі қызмет ететіні туралы жазған болатынбыз.