Ұлы Жеңістің 70 жылдығына арналған автошеру Ақтөбеге келіп жетті (ФОТО)

АҚТӨБЕ. ҚазАқпарат - Екі күн бұрын Шалқар аудан орталығынан басталған автошеру қатысушыларын Ақтөбедегі Әлия Молдағұлова даңғылындағы Мәңгілік алаудың жанында Есет батыр атындағы мектептің, Т.Бигелдинов атындағы Әуе қорғанысы күштері әскери институтының курсанттары, Ақтөбе гарнизонына қарасты бөлімдердің әскери қызметкерлері, оқушылар қарсы алды.

Шара автошеруге демеушілік қолдау көрсеткен «Тәжік-ауған шекарасындағы әскери іс-қимылдар мен әскери қақтығыстарға қатысушы ардагерлер одағы» қоғамдық бірлестігі мен ҚР Тұңғыш Президенті қорының туларын ортаға алып шығудан басталды.

«Ұлы Жеңістің 70 жылдығына арналған акциямыздың ұраны - «Батырларымызды құрметтеп, есімдерін есте сақтау». Менің қызметтестерім соғыс пен ұрыстар туралы көп біледі, соның ортасында жүрген. Біздің бірлестігіміздің ауған соғысының ардагерлері және чернобыльдықтармен бірлесіп өткізіп отырған әскери-патриоттық жұмысында ұсақ дүние жоқ, бәрі де маңызды. Ақтөбеден Орал қаласына шығамыз. Одан кейін Атырау облысында тәжік-ауған шекарасын қорғау кезінде қаза тапқан қызметтестеріміздің оқыған мектептерінде мемориалдық тақтайшалар ашамыз. Автошеру Маңғыстау облысында аяқталады», - деп баяндады автошеруді басқарып отырған запастағы подполковник Мұрат Мұхамеджанов.