Ұрпақтың алтын жібі: Астанада фототілші Нұрмұхаммат Имамовтың көрмесі ашылды
АСТАНА. KAZINFORM — ҚР ПІБ Президенттік орталығында фототілші Нұрмұхаммат Имамовтың 100 жылдығына және Халықаралық әйелдер күніне арналған «Ұрпақтың алтын жібі» көрмесі ашылды.
Шара аясында Ұлы Отан соғысының ардагері, кәсіби фотошежіреші Нұрмұхаммат Имамовтың 70-ке жуық жұмысы көпшілік назарына ұсынылды. Экспозицияда қарапайым еңбек адамының бейнесі, жұмысшы мамандықтарының қадір-қасиеті мен өндіріс өмірі айқын көрініс тапқан.
Сонымен қатар 1960-1980 жылдары түсірілген Целиноградтағы тігінші әйелдердің сирек фотосуреттері көрменің мазмұнын толықтырды.
ҚР ПІБ Президенттік орталығының жетекші сарапшысы Қанат Бөстекбаев көрменің тарихи және мәдени маңызына ерекше тоқталды. Оның айтуынша, фототілшінің еңбектері өткен дәуірдің шынайы бейнесін сақтап қалған құнды мұра.
— Нұрмұхаммат Имамовтың еңбектері — уақытпен тілдескен туындылар. Оның объективі бізді ондаған жыл артқа жетелеп, сол кезеңнің атмосферасын сезінуге мүмкіндік береді. Сонымен қатар бұл көрме — еңбек адамдарына деген құрметтің көрінісі. Өйткені автордың фотосуреттері жұмысшы мамандықтарының маңызын айқын көрсетеді. Көрме бір ай бойы жалғасады, оны қала тұрғындары мен қонақтары келіп тамашалай алады, — деді ол.
Фотохроникашының ұлы Ринат Имамов көрмені әке рухына тағзым ғана емес, қаланың мәдени мұрасын толықтыратын маңызды жоба деп бағалайды.
— Мұнда әкемнің таңдаулы туындыларымен қатар, тұтас тарих жатыр. Әсіресе тігін цехтарынан түсірілген фотолар сол кезеңдегі тігінші әйелдердің еңбегін айқын көрсетеді. Осындай игі шараның мерейтой қарсаңында ұйымдастырылуы — біз үшін үлкен құрмет. Президенттік орталық ұжымына шынайы алғысымды білдіремін, — деді Ринат Имамов.
Оның айтуынша, фототілшінің жеке архиві өте ауқымды. Алдағы уақытта мерейтой аясында жаңа жобалар ұйымдастырылып, Нұрмұхаммат Имамовтың шығармашылық мұрасын кеңінен таныстыру жалғасады.
Айта кетейік, бұған дейін Президенттік орталықта гендерлік және отбасылық саясат мәселелері талқыланған болатын.
