Ұстаздар күні мұғалімдерге гүл сыйлау — дәстүр — министрлік

АСТАНА. KAZINFORM — Алда ұстаздар мерекесі келе жатыр. Оқушылар мен ата-аналардың мұғалімдерге құрмет көрсетіп, гүл сыйлайтын әдеті бар. Сонымен ұстаздарға гүл сыйлауға бола ма? Оқу-ағарту министрлігі түсінік берді.

«Мереке қарсаңында әріптестерден „Мұғалімге гүл сыйлауға бола ма?“ деген сұрақтар түсе бастады. Осы орайда аталған сұраққа қатысты ұстанымды білдіргім келеді. Ұстаздар күні — ерекше күн, мереке педагогтердің біздің өміріміздегі маңызды рөлін тағы бір еске салады. Гүл сыйлау — тәрбиелеу мен оқытуға бар күш-жігерін жұмсаған ұстаздарға алғыс білдірудің мүмкіндігі. Ізгі лебіз білдіру мұғалімдерге білдіретін алғыс сезіміміздің белгісі. Мұндай ықылас ұстаз еңбегінің маңыздылығын көрсетіп қана қоймай, ұрпақтар арасындағы сыйластық қарым-қатынасты нығайта түседі. Айта кету керек, ұстазға құрмет көрсету ұрпақтар арасында сақталып келе жатқан дәстүр», — деп жазды ведомствоның ресми өкілі Мереке Амангелдіқызы желідегі парақшасында.

Еске сала кетсек, Оқу-ағарту министрі Ғани Бейсембаев алғашқы қоңырауда ұстаздарға гүл сыйлау керек пе деген сауалға жауап берген еді.