Вьетнам алғашқы ұлттық деректер орталығын іске қосты
АСТАНА. KAZINFORM — Вьетнам Ханойдағы Хоа Лак технологиялық паркінде өзінің алғашқы ұлттық деректер орталығын ашты, деп хабарлайды Vietnam News Agency.
20 гектардан астам аумақты алып жатқан орталық Оңтүстік-Шығыс Азиядағы ең ірі орталықтардың бірі болды. Бұл табиғи апаттарға төзімділігін және қауіпсіздіктің ең жоғары стандарттарына сәйкестігін растайтын халықаралық сертификаттардың жоғары санатын алған алғашқы ұлттық деңгейдегі нысан.
Премьер-министр Фам Мин Тьинь екі жылдық жобаның аяқталуына арналған ашылу салтанатында оның стратегиялық маңыздылығы мен елдің цифрлық экономикасын, қоғамды және адам ресурстарын дамытудағы рөлін атап өтті. Оның айтуынша, деректер орталығы цифрлық трансформацияның «жүрегі» және Вьетнамның гүлденген даму дәуірінің «миы» ретінде қарастырылады.
Үкімет басшысының атап өтуінше, жобаны жүзеге асыру әкімшілік рәсімдерді жылдамдатуға, бизнес жүргізуді жеңілдетуге, өндірісті дамытуды ынталандыруға және халықтың өмір сүру сапасын жақсартуға мүмкіндік береді. Ол сондай-ақ деректерді елдің бәсекеге қабілеттілігін арттырып, жасанды интеллектті дамытуға негіз жасай алатын стратегиялық ресурс және ұлттық байлық ретінде қарастыруға шақырды.
№ 1 Ұлттық деректер орталығы және онда орналасқан деректер базасы жүйесі цифрлық трансформация жаңа мемлекеттік стратегиясының негізгі элементтеріне айналды. Оның аясында Вьетнам 2030 жылға қарай тағы екі дата орталығын салып, мемлекеттік қызметтердің кем дегенде 90 пайызын онлайн форматқа өткізуді жоспарлап отыр.
Бұған дейін Қазақстан цифрлық бәсекеге қабілеттілік рейтингінде ТОП-35 елдің қатарына енгенін жазған болатынбыз.
