Юлия Путинцева Ыстанбұл турнирінің жартылай финалына шықты

НҰР-СҰЛТАН. ҚазАқпарат – Қазақстандық, әлемнің 51-ракеткасы Юлия Путинцева Ыстанбұл WTA 250 турнирінің жартылай финалына шықты, деп хабарлайды ҚазАқпарат тілшісі.

Ю.Путинцева ширек финалда дүниежүзілік рейтингте өзінен он саты жоғары тұрған аустралиялық Айла Томляновичпен күш сынасты.

Бірінші партияны бір брейкті артық жасаған аустралиялық теннисші өз есебіне жазды – 7:5.

Есесіне екінші сетті Ю.Путинцева брейкпен бастап, сол қарқынын бәсеңдеткен жоқ – 6:2.

Қазақстандық теннисші үшінші, шешуші партияда да брейкпен алға кетті – 2:0. Ақыры осы басымдылығынан айырылмай, матчты жеңіспен түйіндеді – 6:4.

Аса тартысты өткен бәсеке 2 сағат 45 минутқа созылды.

Ю.Путинцева жүлде қоры 251,7 мың АҚШ долларына бағаланған жарыстың финалына шығу үшін әлемнің 47-ракеткасы, испаниялық Сара Соррибес-Тормо немесе рейтингте 122-сатыдағы ресейлік Анастасия Потапованың біреуімен таласады.

Еске сала кетейік, бұдан бұрын Юлия Путинцеваның Ыстанбұл турнирінің ширек финалына шыққанын, Елена Рыбакинаның тартысты матчта әлемнің үшінші ракеткасына жол бергенін жазған болатынбыз.

Сондай-ақ Жібек Құламбаева Шымкент турнирінің ширек финалына шықты.

Ж.Құламбаева бүгін ширек финалда ресейлік Татьяна Барковаға жол берді – 6:2, 2:6, 0:6.