Зәкиева Алматы облысындағы мектеп-интернаты жайында: 170 бала ауыр жағдайда өмір сүріп жатыр
АСТАНА. KAZINFORM – Балалар омбудсмені Динара Зәкиева Алматы облысындағы мектеп-интернаттың жағдайымен танысты.
- Кеше Алматы облысында «Балаларды қорғау» қорының жетекшісі Жанна Ахметовамен бірге И. Нүсіпбаев атындағы мектеп-интернатындағы балалардың өмір сүру жағдайын зерттедік. 6 жастан асқан 170 бала интернатта ауыр жағдайда өмір сүріп жатыр. Үш жыл бұрын мекемеде күрделі жөндеу жұмыстары басталғанымен, мердігер оны аяқтамай кеткен. Соның салдарынан балалар жартылай қираған ғимаратта тұруға мәжбүр. Оқу корпусында түнеп, спортзалда тамақтанады, санитарлық-гигиеналық нормалар да бұзылып отыр, - деп жазды Д. Зәкиева Instagram-дағы парақшасында.
Бұл мәселені және облыстағы балалар қауіпсіздігіне қатысты тағы екі маңызды мәселе Алматы облысының әкімі Марат Сұлтанғазиевпен кездесу барысында талқыланған. Әкімдік жөндеу жұмыстарын аяқтау немесе жаңа интернат салу мәселесін қарастырған. Алайда балалардың қазіргі қиын жағдайында қалмауы үшін оларды жақында жөндеуден өткен және бос орындары бар басқа интернатқа көшіру туралы шешім қабылданды.
- Сондай-ақ кездесуде Психологиялық қолдау орталығының жұмысы мен қорғаншылық органдары қызметкерлерінің санын арттыру мәселесі көтерілді. Қабылданған заңға сәйкес, 5000 балаға 1 қызметкерден келуі керек. Осылайша, облыста 109 қызметкер болуы тиіс, әр ауданда шамамен 10 маманнан. Бұл жүйенің тиімді жұмыс істеуі, балаларды қорғау және зорлық-зомбылықтың алдын алу шараларын сапалы жүргізу үшін өте маңызды, - делінген омбудсмен мәліметінде.
Бұдан бөлек ол өңірлік уәкіл Айгүл Есімбековамен және Психологиялық қолдау орталығының ұжымымен кездесті. Қазіргі кезде орталықтың кураторлары мектептерді аралап, суицидтің алдын алуға арналған бірыңғай бағдарлама енгізу жұмысын атқарып жатыр.
- Айта кету керек, сәуір айында Алматы облысының аудандарында Оқу-ағарту министрлігі Балалардың құқықтарын қорғау комитеті, Мәдениет, Денсаулық сақтау, Ішкі істер министрліктеріндегі әріптестермен бірге 7-10 күндік жұмыс жоспарлап отырмыз, - деп түсіндерді Д. Зәкиева.
Бұған дейін Динара Зәкиева 12 жасқа дейінгі балаларды үлкендердің қарауынсыз қалдыруға заңды түрде тыйым салу туралы бастама көтерді.
