Жаркент гарнизонында офицер жарақат алып, көз жұмды

АСТАНА. KAZINFORM – Офицер жоспардан тыс оқу-жаттығу барысында қауіпсіздік шарасын сақтамау салдарынан мерт болды. Оқиғаны ҚР Құрлық әскерлерінің баспасөз қызметі растады.

«14 қарашада диверсияға қарсы қауіпсіздік бойынша жоспардан тыс сабақ барысында қауіпсіздік шарасын сақтамау салдарынан Жаркент гарнизоны әскери бөлімінің офицері алған жарақаттан көз жұмды», - делінген хабарламада.

Ақпаратта айтылғандай, қылмыстық іс қозғалды, тергеу мүддесі үшін өзге де ақпарат жариялауға жатпайды.

«Құрлық әскерлерінің қолбасшылығы марқұмның туыстары мен жақындарына көңіл айтады, оларға барлық қажетті көмек көрсетіледі», - дейді әскери ведомстводан.

Айта кетсек, таяуда ШҚО-да мерзімді қызметтегі әскери қызметші қаза болды. 

Ал қазан айында Приозерск гарнизонында әскери қызметші өзін атып мерт болды. 

Одан бөлек, Шахтинск қаласында әскери қызметшінің денесі табылған еді.