Жібек Құламбаева Мажарстандағы турнирде жарыстың 4-ракеткасын ұтты

АСТАНА. KAZINFORM – Қазақстандық теннисші, әлемнің 322-ракеткасы Жібек Құламбаева Секешфехервар (Мажарстан) ITF W75 турнирін жеңіспен бастады.

Қазақстандық теннисші алғашқы айналымда әлемнің 143-інші, осы жарыстың 4-ракеткасы, корт иесі Панна Удвардидың мысын басты.

Бірінші партия Жібектің айқын басымдылығымен аяқталды – 6:1. Ол екінші сетте де мүмкіндігін жіберген жоқ – 7:5.

Тартысты өткен матч бір сағат 45 минутқа созылды.

Жібек Құламбаева ширек финалға шығу үшін рейтингіде 335-сатыдағы түркиялық Чала Бюйюкакчаймен таласады.

Ж.Құламбаева қазіргі кезде WTA Live рейтингісінде 318-орынға көтеріліп тұр.

Қазақстандық спортшы хорватиялық Тара Вюртпен бірге жұптық сында да өнер көрсетеді. 

Еске сала кетейік, бұдан бұрын Индиан-Уэллс турнирінде 17 жастағы теннисшінің екінші рет Рыбакинаның жолын кескенін жазған болатынбыз.