Жібек Құламбаева Түркиядағы жарыстың жартылай финалына өтті

АСТАНА. KAZINFORM — Қазақстандық теннисші Жібек Құламбаева жұптық сында Анталия (Түркия) ITF W35 турнирінің жартылай финалына шықты.

Жарыстың 1-ракеткасы болып тіркелген қазақстандық теннисші италиялық Николь Фосса Уэргомен бірге бастапқыда болгариялық Денислава Глушкова — словакиялық Виктория Морвайованың мысын басты — 6:1, 6:3.

Ширек финалда қазақстандық-италиялық жұп Италия өкілі Альессандра Маззола — румыниялық Андрея Пришакарудан айласын асырды — 6:3, 6:4.
Бәсеке бір сағат 18 минутқа созылды.

Құламбаева — Уэрго финалға шығу үшін ресейліктер Анастасия Гасанова — Анастасия Гурьевамен таласады. Бұл дуэт ширек финалда болгариялық Лия Каратанчева — ресейлік Ксения Ласкутованы жолдан тайдырды — 6:7 (5:7), 6:3, 4:10.

Еске сала кетейік, бұдан бұрын Анна Данилинаның Доха жарысының ширек финалына жолдама алғанын жазған болатынбыз.