Жібек Құламбаева Астанадағы жарыстың финалына шыға алмады

АСТАНА. ҚазАқпарат – Қазақстандық Жібек Құламбаева жұптық сында Астанада өтіп жатқан ITF World Tennis Tour «BeeTV 60 Women's» турнирінің финалына шыға алмады, деп хабарлайды ҚазАқпарат тілшісі.

Қазақстандық теннисші поляк қызы Мартина Кубкамен бірге жартылай финалда ресейліктер Полина Кудерметова – Анастасия Тихоновамен шеберлік байқасты.

Бірінші партияда Жібек пен Мартина 7:5 есебімен басым түсті. Олар екінші сетте де алға шыққанымен, шешуші сәттерде қателіктерге бой алдырып, мүмкіндіктерін пайдалана алмады – 5:7.

Супер тай-брейкте ресейлік жұп жеңісті жұлып алды – 10:3.

Осылайша, Ж.Құламбаева жарысты жартылай финалдан аяқтады.

Еске сала кетейік, бұдан бұрын Жібек Құламбаеваның Астанадағы жарыстың жартылай финалына шыққанын жазған болатынбыз.