АСТАНА. KAZINFORM — Қазақстандық теннисші Жібек Құламбаева жұптық сында Чьянчжоу (Қытай) WTA турнирін жеңіспен бастады. Қазақстандық теннисші нидерландылық Изабель Ховерлагпен бірге алғашқы айналымда қытайлықтар Цюй Ихань – Чжан Жуйэньнің мысын басты.
Бірінші партияда қазақстандық-нидерландылық жұп 6:3 есебімен басымдық танытты. Екінші сетте жергілікті теннисшілер есе қайырды – 6:4.
Супер тай-брейкте Ж.Құламбаева – И.Ховерлаг жеңісті жұлып алды – 10:5.
Бір сағат 25 минутқа созылған бәсеке барысында Жібек пен Изабель эйс жасамағанымен, 10 брейк-пойнттың төртеуін пайдаланды.
Қытайлық дуэт 4 эйс, 3 брейкпен (6 брейк-пойнт) көзге түсті.
Жібек Құламбаева – Изабель Ховерлаг жартылай финалға шығу үшін жарыстың 1-ракеткалары, ресейлік Мария Козырева – ұлыбританиялық Майя Лумсденмен таласады.
Еске сала кетейік, бұдан бұрын Елена Рыбакинаның әлемдік рейтингіде көшбасшылық орнын нығайта түскенін жазған едік.
Сондай-ақ Бейбіт Жұқаев Сеул турнирінде негізгі жарысқа қосылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).