Ақауы бар жаңа көлікті қайтарып беруге кедергі келтіретін норма жойылады

АСТАНА. KAZINFORM – Зауыттан ақауы бар жаңа көлікті автосалонға қайтарып беруге кедергі келтіретін заң нормасы жойылады. Бұл туралы ҚР СИМ Тұтынушылардың құқықтарын қорғау комитеті төрағасының орынбасары Серік Құсайынов айтты.

– 2021 жылдың соңында Өнеркәсіптік саясат туралы заңды қабылдау кезінде депутаттар біздің заңға өзгеріс енгізу бастамасын көтерді. Ол заңға Өнеркәсіп министрлігі жауапты болды. Осы заң жобасын қабылдау кезінде «Техникалық тұрғыда күрделі тауар» ұғымы және оған қатысты норма енгізілді. Автомобиль, катер, трактор секілді техникаларға тұтынушы құқығын қорғаудың жалпы нормалары жүрмейтін болды. Қоғам ондай нормаға қарсы екенін білдірді. Енді қазір Мәжілісте қаралып жатқан заң жобасында осы норма қайтадан алынып тасталды. Қоғамдық бірлестіктер өкілдері ондай норманың қайтадан еніп кетпеуін жіті қадағалайтын болады, - деді ол «Тұтынушылардың құқықтарын қорғау: бизнес, мемлекет және қоғам диалогы» атты форумда.

Спикер жаңа көліктерге қатысты шағымның көп екенін айтты.

– Бір мысал келтірейік, әйел адам Zeekr автокөлігін сатып алған. Одан кейін ақау анықталған. Сонда да автосалон кейін оның құқығын қалпына келтіруге асықпай, анда-мында жүгірте берген. Осыдан соң тұтынушы бізге шағымданды. Біз қолданыстағы заңнан тиісті норманы тауып, оның құқығын қорғай алдық, - деп түйді сөзін Серік Құсайынов.

Еске сала кетсек, елімізде 2023 жылдың қыркүйегінен бері Тұтынушылардың құқығын қорғау туралы жаңа заң жобасы қаралып жатыр. Қазір ол Мәжілістің қарауында.

Жаңа заң қабылданған соң тұтынушы 4 сатылы шағымдану кезеңдерінен өтпестен, бірден сотқа жүгіне алатын болады. 

Тұтынушылар құқығын қорғау омбудсмені институты құрылады.

Электрондық сауда саласында да өзгеріс болады.

Әуе тасымалы саласында билет құнын қайтарып алу мүмкіндігін беретін норма да енгізілуі мүмкін.