Ақтөбеде аудан әкімдері жаппай қызметтік көлігін жаңартып жатыр
АҚТӨБЕ. KAZINFORM — Ақтөбеде аудан әкімдері жаппай көлігін жаңалап жатыр. Kazinform тілшісі Мемлекеттік сатып алудың қалай жүргенін саралап көрді.
Ақтөбе облысында аудан әкімдерінің қызметтік көліктерін жаңартып жатқаны туралы ақпарат желдей есіп жүр. Kazinform тілшісі ашық ақпарат көздері арқылы олардың көлік сатып алуға бюджеттің қанша қаржысын жұмсағанын салыстырып көрді.
Мәселен, Алға ауданы әкімінің аппараты бірден екі көлік алуды жөн көрген. Әрқайсысына 14 500 000 теңге ұсынды. Екі көлік бюджетке 29 млн теңгеге шығып тұр.
Техникалық талап бойынша А класты көлемі 2 000 текше см болуы тиіс. Келісімшарт жасалды, жеңімпаз «Hyundai Premium Almaty» ЖШС.
Ал Байғанин ауданы әкімінің аппараты техникалық ерекшеліктерге сәйкес жол талғамайтын қызметтік автокөлікті сатып алды.
Талап бойынша көлемі 2993 текше см-ден аспайтын көлік болуы тиіс. Жеткізуші — West line ltd жауапкершілігі шектеулі серіктестігі. Көліктің құны 27 млн теңгеден асады.
Мұғалжар ауданы әкімі аппараты болса, көлемі 2000 текше см-ге дейінгі көлікке тапсырыс берген. Жеткізуші — «Агро Холдинг Казахстан» жауапкершілігі шектеулі серіктестігі. Конкурсқа 16 400 000 теңге бөлінді.
Әйтеке би ауданы әкімі аппараты да жол талғамайтын көлікке мемлекеттік сатып алу өткізді. Конкурсқа екі компания қатысып, WEST TRUCK SERVICE ЖШС жеңімпаз болды. Көлік 24 107 000 теңге сатып алынды.
Мәртөк ауданы әкімінің аппараты да жеңіл көлікке тапсырыс берген. Ашық конкурс кезінде көлік 11,5 млн теңгеге сатып алынды. Жеткізуші — Kol-Auto-Great жауапкершілігі шектеулі серіктестігі.
Хромтау ауданы әкімі аппаратыны жариялаған конкурс мәліметіне сүйенсек, 16 690 000 теңгеге жеңіл көлік қажет. Қазіргі кезде бұл ашық конкурс жарияланып тұр.
Алғашқылардың бірі болып конкурс жариялаған Ырғыз ауданы әкімінің аппараты болып шықты. Мұнда көлік сатып алуға бюджеттен 26 500 000 теңге қаралған. Жеткізуші — WEST TRUCK SERVICE ЖШС.
«Шарттың жалпы сомасы — 29 680 000 (жиырма тоғыз миллион алты жүз сексен мың тенге нөл тиын) теңге. Ол тауар жеткізуге қатысты бүкіл шығынды, сондай-ақ Қазақстан заңнамасында көзделген барлық алым-салықты, оның ішінде ҚҚС 3 180 000 теңгені (үш миллион жүз сексен мың теңге нөл тиын) қамтиды», — деп жазылған.
Демек көлікке бөлінген қаржы арта түскен.
Шалқар ауданы әкімінің аппараты болса, 7 550 000 теңгеге көлік сатып алды. Жеткізуші жеңімпаз — «Сырдарья Авто» ЖШС.
Ойыл ауданы да 21 490 000 теңге бөліп, көлікке тапсырыс берді. Алайда сатып алу өтпеді.
Қарғалы ауданы әкімінің аппараты екі көлік сатып алуға тапсырыс берді. Біріне 8,1 млн, екіншісіне 11,8 млн теңге ұсынды.
Екі сатып алу да өтті. Жеткізуші — Allur сауда үйі.
Мемлекеттік сатып алу конкурсынан Қобда ауданы әкімі аппаратының да тапсырыстарын қарап көрдік.
Алайда өңір бойынша осы аудан әкімдігінде ғана көлік сатып алу конкурсы көрінбеді.
Еске салсақ, былтыр Kazinform аудан әкімдерінің айлығы туралы жазған еді.
